Авлигатай тэмцэх газар (АТГ)-аас 2024 оны 10 дугаар сарын 30-нд “Төв цэнгэлдэх хүрээлэн” ХХК-ийн гүйцэтгэх захирлын албан тушаалд Ж.Энхжаргаланг томилох нь ашиг сонирхлын зөрчилтэй нөхцөл байдал үүсгэнэ хэмээн албан ёсоор мэдэгдэж, хууль зөрчихөөс сэрэмжлүүлж байжээ. Гэвч тус компанийн Төлөөлөн удирдах зөвлөл энэхүү анхааруулгыг үл харгалзан, түүнийг гүйцэтгэх захирлаар томилсон нь хууль зөрчсөн шийдвэр болсон гэж үзэх үндэстэй байна.

АТГ-ын албан бичигт дурдсанаар Ж.Энхжаргалан нь “Броадбэнд” ХХК, “Парагон проперти” ХХК, "Би Ар Би" ХХК зэрэг компанийн 100 хувь эзэмшигч, үүсгэн байгуулагч, захирал бөгөөд эдгээр компаниуд нь тайз, тайзны тоног төхөөрөмж, худалдаа үйлчилгээ, соёлын арга хэмжээ зохион байгуулах чиглэлээр үйл ажиллагаа явуулдаг. Харин “Төв цэнгэлдэх хүрээлэн” ХХК нь мөн адил соёл урлагийн арга хэмжээ, худалдаа үйлчилгээ зохион байгуулдаг тул нийтийн болон хувийн ашиг сонирхол нь давхцсан гэж үзжээ.

Энэ нь Нийтийн албанд нийтийн болон хувийн ашиг сонирхлыг зохицуулах тухай хуулийн 23 дугаар зүйлийн 23.6 дахь хэсгийг илтэд зөрчсөн үйлдэл бөгөөд ашиг сонирхлын зөрчлийг урьдчилан сэргийлэх хуулийн заалтыг үл тоомсорлосон гэж АТГ дүгнэсэн байна.

АТГ-ын Хяналт, шалгалт, дүн шинжилгээний хэлтсийн дарга, эрхэлсэн комиссар Т.Энхболдын гарын үсэгтэй уг албан бичигт “ашиг сонирхлын зөрчил үүсгэх нөхцөл байдал байгаа тул тухайн албан тушаалд томилохгүй байх”-ыг албан ёсоор зөвлөсөн хэдий ч уг зөвлөмжийг үл хэрэгсэж, томилгоог хийсэн нь төрийн албан тушаалд хууль зөрчин томилгоо хийж буй нэгэн жишээ болж байна.

ЭХ СУРВАЛЖ: NEWSTV.MN