Засгийн газраас “Эрдэнэс таван толгой” ХК-д зургаан сарын хугацаатай Онц байдал тогтоож, Бүрэн эрхт төлөөлөгч томилсонтой холбоотойгоор тус компанийн гүйцэтгэх захирал Б.Ганхуягийг үүрэгт ажлаас нь чөлөөлсөн.
Тэгвэл хуулийн байгууллагаас Б.Ганхуяг болон тус компанийн Худалдан авалтын хэлтсийн дарга Б.Отгонжаргал, Дотоод хяналт, эрсдэлийн удирдлагын газрын дарга Х.Нурлат нарыг шалгаж эхэлсэн бөгөөд АТГ-аас өчигдөр Б.Отгонжаргал, Х.Нурлат нарыг цагдан хорьжээ. Тэднийг албаны эрх мэдлээ урвуулан ашиглаж, үндэслэлгүйгээр хөрөнгөжсөн, бусдад давуу байдал олгосон байж болзошгүй гэх үндэслэлээр шалгаж байгаа ажээ.
Нүүрсний хэргээр цагдан хоригдоод буй Б.Отгонжаргал гэгчийн тухайд УИХ-ын гишүүн, ХНХ-ын сайд Т.Аюурсайхантай ойрын холбоотой нэгэн ажээ.
Тодруулбал, Б.Отгонжаргал нь 2016 оны УИХ-ын сонгуулийн үеэр нэр дэвшигч Т.Аюурсайханы сонгуулийн штабт хуулийн зөвлөх, 2017-2018 оны хооронд УИХ-ын гишүүн Т.Аюурсайханы зөвлөхөөр ажиллаж байгаад Б.Ганхуяг "Эрдэнэс таван толгой" ХК-ийн гүйцэтгэх захирлаар томилогдсон үетэй давхцан тус компанид ажилд оржээ.
Т.Аюурсайхан, Б.Отгонжаргал нарын тухайд 2016 онд “Хохирогчдын эрхийг хамгаалах шударга ёсны холбоо” нэртэй ТББ-ыг хамтран үүсгэн байгуулж байснаас гадна 2017 онд Т.Аюурсайхан МАН-ын Шинэчлэл хөгжлийн хорооны даргаар томилогдоход Б.Отгонжаргал мөн тус хорооны ерөнхий нарийн бичгийн даргаар сонгогдож байжээ.
УИХ-ын гишүүн Т.Аюурсайханы тухайд Б.Ганхуягаар дамжуулж “Эрдэнэс таван толгой”-д олон хүн ажилд оруулсан гэдэг мэдээлэл байдаг бөгөөд тэдгээрийн нэг нь өдгөө нүүрсний хэргээр цагдан хоригдоод буй Б.Отгонжаргал гэгч юм байна.
Үргэлжлэл бий...
ЭХ СУРВАЛЖ: NEWSTV.MN
Сэтгэгдэл (5)