Тулгар төрийн 2230, 2231 жил, Их Монгол Улс байгуулагдсаны 815, 816 жил, Үндэсний эрх чөлөө, тусгаар тогтнолоо сэргээн мандуулсны 110, 111 жил, Ардын хувьсгалын 100, 101 жилийн үндэсний их баяр наадмыг угтан Ерөнхийлөгч У.Хүрэлсүх өнөөдөр /2022.07.07/ төрийн дээд одон медаль гардуулж байна.
Энэ үеэр Монгол Улсын Ерөнхийлөгчийн зарлигаар Монгол Улсад дэгдсэн таван удаагийн халдварт өвчний голомтонд ажиллаж, эрүүл мэндийн салбарт 37 жил тэр дундаа эмнэлгийн тусламж үйлчилгээг удирдан 27 жил ажилласан ХӨСҮТ-ийн Эмчилгээ эрхэлсэн Дэд захирал асан, Сүрьеэгийн зөвлөх эмч, Дотрын тэргүүлэх зэргийн эмч, ХӨСҮТ-ийн клиникийн профессор М.Тунсагт Монгол Улсын хүний гавьяат эмч цол хүртээлээ.
Энэ үеэр Ерөнхийлөгч У.Хүрэлсүх "Хүн ардынхаа эрүүл мэндийг хамгаалах үйлсэд 37 жил хөдөлмөрлөхдөө дотрын болон халдварт эмнэлгийн тусламж үйлчилгээг олон өвчтөнд үзүүлж, орон нутаг, аймаг, хот хоорондын алсын дуудлагад 528 удаа ажиллан, эмнэлгийн тусламж үйлчилгээг иргэдэд шуурхай газар дээр нь үзүүлэхдээ мэргэжлийн ур чадвар дайчлан хөдөлмөрлөж, бүх нийтийг хамарсан халдварт өвчин вирусийн халдваруудын голомтуудад ажиллаж, 2015-2016 онд дэгдсэн Улаан бурхан өвчний тархалтыг бууруулах ажлыг улсын хэмжээнд зохион байгуулахад санаачилгатай оролцож, дэлхийн нийтийг хамарсан Коронваируст халдварын тархалтын үед ХӨСҮТ-ийн эмнэлгийн тусламж үйлчилгээг мэргэжлийн удирдлагаар ханган ажиллаж, эрүүл мэндийн салбарын хөгжилд оруулсан хувь нэмрийг нь өндрөөр үнэлэн ХӨСҮТ-ийн Дэд захирал асан Мөрнэрэнгийн Тунсагийг Монгол Улсын ХҮНИЙ ГАВЬЯАТ ЭМЧ-ээр шагнаж байна." гэдгийг онцлон тэмдэглэв.
М.Тунсаг нь эрүүл мэндийн салбарт нийт 37 жил жил үр бүтээлтэй ажилласан бөгөөд үүнээс 27 жилийг ХӨСҮТ-д дотрын эмч, тасгийн эрхлэгч, эмчилгээ эрхэлсэн дэд захирал хүртэл дэвшин ажилласан. Мөн дэлхий нийтэд нүүрлэсэн Коронавируст халдварын хүнд үеийг даван туулахад улсын хэмжээнд эмнэлгийн тусламж, үйлчилгээний бэлэн байдлыг хангаж, удирдан зохион байгуулж байв. Сүүлийн гурван жил ХӨСҮТ-ийн халдварт голомтын үед ар албыг бүрэн даан, эрсдэлийг зохицуулан, урьдчилан сэргийлж ажилласан М.Тунсаг нь эрүүл мэндийн салбарт бодит хувь нэмэр оруулсан эрхмүүдийн нэг билээ.
