МАН-ын дэргэдэх Нийгмийн ардчилал Монголын оюутны холбооны ерөнхийлөгчөөр ажиллаж байгаад Гэр бүл хүүхэд залуучуудын хөгжлийн газрын даргаар дэвшин томилогдсон Г.Батдорж гэгч төсвийн хөрөнгийг үр ашиггүй зарцуулж байгаа баримтыг Шилэн дансны мэдээлэлд тулгуурлан цувралаар хүргэж байна.
Бошгыг халах залуучуудын эвлэл нэрээр анх үүсгэн байгуулагдаж байсан Монголын залуучуудын холбооны 100 жилийн ой саяхан буюу өнгөрсөн 08-р сарын 25-ний өдөр тохиосон.
Харин тус байгууллагын 100 жилийн ой тохиосонтой холбоотойгоор Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газраас / ГБХЗХГ/ тус холбоонд их хэмжээний мөнгө төгрөг шилжүүлж “бэлэг” барьсан байх юм.
Тухайлбал, Гэр бүл хүүхэд залуучуудын хөгжлийн газрын дарга Г.Батдоржийн 2021 оны 08-р сарын 18-ний өдөр гаргасан А/94 тоот тушаалын дагуу ГБХЗХГ-аас 2021 оны 08-р сарын 20-ний өдөр 45 сая төгрөгийг, 08-р сарын 25-ний өдөр 36 сая төгрөгийг буюу нийт 81 сая төгрөгийг тушаал гарснаас хойш 7 хоногийн дотор Монголын залуучуудын холбоо руу шилжүүлжээ.
Энэ мөнгийг дараах үйл ажиллагаанд зарцуулсан байх бөгөөд фото зургийн үзэсгэлэн зохион байгуулахад 38 сая төгрөг, “Залуус эрдэм шинжилгээний бага хурал” зохион байгуулахад 12 сая төгрөг, “Ирээдүйгээ хамтдаа бүтээе” нөлөөллийн үйл ажиллагаа явуулахад 21 сая төгрөг гэх мэтээр төсөвлөжээ.
Монгол Улсад зах замбараагаа алдсан олон төрийн бус байгууллага үйл ажиллагаа явуулж байгаа. Харин эдгээр ТББ-уудын нэг болох Монголын Залуучуудын холбоо руу төрийн агентлагийн нэг дарга нь энэ мэт тушаал гаргаж мөнгө, төгрөг шилжүүлсэн нь цар тахлын үед төсвийн хөрөнгийг ямар ч шаардлагагүй зүйлд зарцуулсан зүй зохисгүй үйлдэл гэлтэй.
Короновируст цар тахлын нөхцөл байдлаас улбаалан улсын баяр наадмыг нэг жилээр буюу 2022 оны 07-р сар хүртэл хойшлуулах Засгийн газрын шийдвэр гарсан. Гэтэл Гэр бүл, хүүхэд, залуучуудын газраас 2021 оны 06-р сарын 30-ний өдөр “Хурдан морьны уралдаанч хүүхдийн аюулгүй байдалд хяналт тавих” нэрээр 17,7 сая төгрөгийг “Микросити” ХХК-руу шилжүүлжээ.
Мөн тус газраас дахин “Хурдан морьны уралдаанч хүүхдийн аюулгүй байдалд хяналт тавих” нэрээр 5 сая 40 мянган төгрөгийг “Номхур” ХХК-ийн данс руу хийсэн байна.
Энэ үед Улсын баяр наадмыг нэг жилээр хойшлуулах шийдвэр хараахан гараагүй байв. Тиймээс дээрх мөнгийг тухайн үед шилжүүлснийг буруутгах аргагүй. Харин улсын баяр наадам зохион байгуулагдахгүй нь нэгэнт тодорхой болсон учир нь Гэр бүл хүүхэд залуучуудын газар дээрх хоёр компани руу шилжүүлсэн 22 орчим сая төгрөгөө дараа сард нь эргүүлэн авах учиртай.
Гэвч тус газрын шилэн дансны 07 болон 08-р сарын мэдээлэлд энэ мөнгө эргэж шилжиж орсон талаарх нэг ч мэдээлэл алга байна.
Товчхондоо, Г.Батдорж гэгчийн балгаар зохион байгуулагдаагүй наадмын хурдан морь унаач хүүхдийн аюулгүй байдалд хяналт тавих нэрээр улсын төсвийн 22 орчим сая төгрөг хувийн компанийн данс руу ороод алга ор сураггүй алга болчихсон байна.
Энэ бол нам дамжиж албан тушаалд хүрсэн этгээдүүд төрийн албанд ороод төсвийн мөнгөнд хэрхэн хүнийрхүү хандаж, тоглодгийн нэг л жишээ юм.
Үргэлжлэл бий...
ЭХ СУРВАЛЖ: NEWSTV.MN
Сэтгэгдэл (3)