Боловсрол, шинжлэх ухааны дэд сайд Г.Ганбаяр 2020 оны хөрөнгө орлогын мэдүүлэгтээ хувьдаа ганц ч бизнесгүй, гэр бүлийн орлогогүй хэмээн мэдүүлжээ.

Харин эрхэм дэд сайд Г.Ганбаярын өөрийнх нь жилийн орлого 99 сая төгрөг бөгөөд хоёр орон сууц, ланд круйзер 200 маркийн нэг автомашин, 46 үхэртэй юм байна.

Энэ бүхнээс хамгийн сонирхолтой нь тэрбээр 450 сая төгрөгийн хадгаламжтай хэмээн мэдүүлжээ.

Түүний хувьд 2018 оноос хойш өнөөг хүртэл тус яамны дэд сайдын албан тушаалыг хашиж буй. 2016 онд Монгол Улсын Засгийн газрын тогтоолоор батлагдсан төрийн албан хаагчдын цалингийн шатлалд дэд сайдын сарын цалинг 1,9 сая төгрөг байхаар заасан байдаг.  

Г.Ганбаярын тухайд өнгөрсөн гурван жилийн хугацаанд буюу нийт 36 сар төрд ажиллахдаа хамгийн ихдээ 68,4 сая төгрөгийн цалин хангамж авсан байх боломжтой байна.

Гэтэл түүнийг ийм хэмжээний цалин хангамжтай, хувийн бизнесгүй, гэр бүлийн орлогогүй мөртлөө яаж, ямар арга замаар 450 сая төгрөгийн хадгаламж бий болгосныг гайхах хүмүүс цөөнгүй байна.