УИХ-ын гишүүн С.Ганбаатар өнөөдөр Монгол Улсын Ерөнхийлөгчийн сонгуульд нэр дэвших баримт, материалаа АН-ын дотоод сонгуулийн хороонд гардуулж өглөө.
Тэрбээр энэ үеэр, “Оюутолгой, Таван толгой, Эрдэнэт болон бусад уул уурхайн баялгийг ард түмэндээ ажлын байр, орлого сургууль цэцэрлэг, эмнэлэг болгож өгье гэдэг үзэл бодол, байр сууриндаа би олон жил тууштай явж байна. Цаашид ч гэсэн явна. Одоо тэмцэхээс илүү үр дүн гаргах хэрэгтэй байна. Ганц ганцаараа тэмцвэл гал болохгүй. Үр дүн гаргамаар байна. Би эрх баригчдын өвөрт ороогүй. Өнөөдөр Монгол ардын намд хүч дутаагүй. Харин тэдний хүч илүүдэж байгаа. Тэдэнд хяналт дутуу байна. Тэд ард түмэнд үйлчлэх, ажлын байр бий болгох тал дээр дутуу ажиллаж байна.
Миний хувьд өнөөдөр Ардчилсан намын дотоод сунгаанд оролцох баримт материалаа бүрдүүлж өглөө. Ардчилсан намд Ерөнхийлөгчид нэр дэвших олон хүчтэй боловсон хүчнүүд бий. Ардчилалд хайртай, ардчиллыг хүндэлдэг хүний хувьд би Ардчилсан намаас нэр дэвшихийг хүсэж, горилж материалаа бүрдүүлж өглөө. Үр дүн хэрхэн гарахыг Ардчилсан намын гишүүд мэднэ. Ардчилсан намын гишүүд ямар ч шийдвэр гаргасан бай би хүндэтгэн ажиллах болно” гэлээ.
Сэтгэгдэл (11)