“Sunee’s Ballet studio”-гийн үүсгэн байгуулагч Б.Сүндэръяа энэ сарын 12-ний өдөр нэгэн УИХ-ын гишүүний холбогдсон хүчирхийлэлийн асуудлаар олон нийтэд хандаж мэдээлэл өгсөн.
Харин уг мэдээлэлтэй холбогдуулан УИХ-ын гишүүн Ц.Анандбазар мэдэгдэл хийж иргэн Б.Сүндэръяагийн ил болгосон мэдээлэлд өөрийгөө холбоогүй гэдгийг хэлсэн юм. Тодруулбал тэрбээр энэ талаар, “Иргэн Б.Сүндэръяа өнөөдөр буюу 2021.04.11-ний өдөр Sunee's Ballet, Butenbayar Sunderya фэйсбүүк хуудастаа ноцтой мэдэгдэл хийсэн байна. Мэдээлэлд нэгэн УИХ-ын гишүүн хүн түүний биед халдсан, улмаар урт хугацаанд дарамтад байлгасан тухай дурдагдсан байгаа юм. Түүнд ийм бусармаг явдал үнэхээр тохиолдсон бол харамсаж байна. Мөн уг асуудлыг хуулийн байгууллага шалгаж буруутай этгээдэд зохих хариуцлагыг хүлээлгэх ёстой гэж үзэж байна. Ийм зүй бус үйлдлийг цаг тухайд нь таслан зогсоож байх ёстой. Харамсалтай нь хэн гэдэг УИХ-ын гишүүн хүн түүнд дарамт үзүүлж байсныг нэрлээгүй учир нийгэмд УИХ-ын гишүүн Ц.Анандбазар буюу намайг холбогдуулан нэрлэж, бичиж эхэлжээ.
Ард түмний өмнө хууль ёсыг сахин биелүүлнэ гэж тангараг өргөсөн УИХ-ын гишүүний хувьд Ц.Анандбазар миний бие Сүнээ гэх нэрээр нийгмийн цахим сүлжээнд танигдсан Б.Сүндэръяаг танихгүй, уулзаж байгаагүй, тухайн мэдээлэлд дурдагдсан шиг үйлдлийг огт хийгээгүй гэдгээ хариуцлагатайгаар мэдэгдье.
Б.Сүндэръяагийн нийгэмд тараасан мэдээлэл нь зөвхөн УИХ-ын гишүүн хэн нэгэн гэхээсээ илүү Монгол Улсын хууль тогтоох дээд байгууллага УИХ-ын нэр хүндтэй холбоотой асуудал яригдаж байгаа учраас уг асуудлын үнэн мөнийг хуулийн байгууллагуудаар нэн яаралтай шалгуулах нь зүйтэй гэсэн байр суурьтай байна. Иймд хуулийн байгуулагад хандаж, шалгуулах арга хэмжээг авах болно” хэмээн нийтэлсэн байдаг.
Тэгвэл өнөөдөр иргэн Б.Сүндэръяа өмгөөлөгчийн хамтаар мэдээлэл хийж өөрийнх нь дэлгэсэн хүчирхийллийн асуудалтай УИХ-ын гишүүн Ц.Анандбазар холбоотой гэдгийг олон нийтэд хандаж хэлчихлээ.
Тэрбээр энэ талаар “Ц.Анандбазар гишүүнтэй 2019 онд танилцаж байсан. Танилцах хүсэлтийг манай найзаар дамжуулан олон удаа тавьж байсан ч тэр болгонд нь татгалзаж байсан. Танилцах шалтгаан байсан юм билээ. Түүнийг нь одоогоор олон нийтэд хэлэх боломжгүй байна. Өргөдөл гомдолдоо тусгасан. Ц.Анандбазар гишүүний асуудлаар 1000 гаруй охин холбогдсон. Ийм асуудал болно гэж тооцоолоогүй. 2020 оны УИХ-ын сонгуулиар намайг ямар ч хамаагүй хүнтэй холбож, бичлэг эвлүүлж хийсэн. Миний хувьд нандин нууцаараа Ц.Анандбазар гишүүнд барьцаалагдсан. Насаараа ингэж дарамтлагдаж чадахгүй. Энэ хүн төрийн өндөр албан тушаалтай, тэрбумтан хүн. Энэ хүнийг би дийлэхгүй болохоор өргөдөл гомдол гаргаж чадахгүй байсан. Бүх нотлох баримт надад байна” хэмээн ярив.
Б.Сүндэръяагийн хэвлэлд өгсөн энэхүү мэдээллээс харвал УИХ-ын гишүүн Ц.Анандбазар “Б.Сүндэръяаг танихгүй, уулзаж байгаагүй, тухайн мэдээлэлд дурдагдсан шиг үйлдлийг огт хийгээгүй гэдгээ хариуцлагатайгаар мэдэгдье” гэсэн нь худал мэдээлэл болж таарч байна.
Сэтгэгдэл (25)