МАН-ын лидер гэгдэх улстөрчдөөс Я.Содбаатар, Ж.Энхбаяр нар 2020 оны сонгуульд нэр дэвшилгүй өнжсөн. Нэр дэвшээгүй шалтгаан нь ЖДҮХС-аас өөрсдийн хамаарал бүхий компаниудаараа их хэмжээний зээл авсан асуудалд ороолцолдсонтой холбоотой. МАН-ын дарга У.Хүрэлсүх ч тэдэнд “нэр дэвшээд хэрэггүй, хэрэв дэвшвэл та хоёроос болж намаараа өвдөг шороодох хэрэг гарна” хэмээн зөвлөсөн гэдэг.

Харин сонгуулийн дараа МАН дахин үнэмлэхүй ялалт байгуулж Я.Содбаатар Шадар сайд, Ж.Энхбаяр Ерөнхий сайдын ахлах зөвлөх болж сонгуульд өнжсөнийхөө шагналыг У.Хүрэлсүхээс хүртэцгээв. Ингээд зогсохгүй У.Хүрэлсүх  “Эрдэнэт үйлдвэр”, “Монголросцветмет” ТӨҮГ-ыг шалгах Засгийн газрын ажлын хэсгийг тэдэнд хариуцуулж өгчээ. Я.Содбаатарыг даргаар, Ж.Энхбаярыг дэд даргаар томилсон байна.

Гэтэл Засгийн газрыг төлөөлж Эрдэнэтийг шалгах ажлын хэсгийн ахлагч Я.Содбаатарыг тус үйлдвэртэй ашиг сонирхлын зөрчилтэй байж магадгүй гэх мэдээлэл хэвлэлээр цацагдах боллоо. Учир нь Шадар сайд Я.Содбаатарын хамаарал бүхий “Химон констракшн” ХХК “Эрдэнэт” үйлдвэрээс зарласан “Москва 300” цогцолбор хорооллыг барих тендерт 2019 онд 2 тэрбум 508 сая 369 мянга төгрөгийн үнийн санал ирүүлээд ялалт байгуулжээ.

Монгол Улсад жишигт тооцогдохуйц “Москва-300” хороолол нь тус бүр 50 айлын орон сууц бүхий 10 давхар зургаан блок барилгаас бүрдэхээр төлөвлөгджээ.

Ямар ч тендерт шаардлага хангахуйц, хамгийн бага үнийн санал ирүүлсэн аж ахуй нэгжийг шалгаруулдаг. “Москва-300” хорооллыг барих тендерт үнийн саналын хувьд “Одкон-Эрчим” ХХК хамгийн бага буюу 916 486 938 төгрөг, “Тавинлан” ХХК хамгийн өндөр буюу 1 085 369 118 төгрөгийн саналыг ирүүлсэн аж. Гэтэл тендерийн хороо 2 899 260 833 төгрөгийн үнийн санал ирүүлсэн “Химон констракшн” компанийг эцсийн шатнаас шалгаруулсан байгаа юм.

“Химон констракшн” компанийн албан ёсны бүртгэл дээр Я.Содбаатарын нэр байдаггүй ч тус компани нь Я.Содбаатарын ангийн найз Шоовдорын Энхтөрийн нэр дээр байдаг талаар хэвлэлд мэдээлжээ. “Химон констракшн”-ы хувьд Я.Содбаатарын УИХ-ын гишүүнээр сонгогдсон Өвөрхангай аймгаас 2018-2019 онд 10 тэрбум 400 сая төгрөгийн төсөвт өртөг бүхий таван тендерийг авсан нь Я.Содбаатар энэ компанийн ард байдаг гэх хардлагыг төрүүлж байгаа юм.

Нөгөөтэйгүүр Я.Содбаатар, Ш.Энхтөр нар “Бес инфраструктур холдинг” ХХК гэх компани дээр нэр холбогддог аж. Тодруулбал, “Бес инфраструктур холдинг” ХХК нь иргэн Ш.Энхтөр болон Я.Содбаатарын 100 хувь эзэмшдэг “Ти Эс Эм” ХХК-ийн нэр дээр бүртгэлтэй байдаг гэнэ.

Эцэст нь, “Эрдэнэт” үйлдвэрээс томоохон тендер авсан “Химон констракшн”-тай энэ мэтээр нэр холбогддог Я.Содбаатарт тус үйлдвэрийг шалгах эрх мэдэл өгсөн нь “чононд хонь хадгалуулсантай”  ялгаа юун.

ЭХ СУРВАЛЖ: NEWSTV.MN