УИХ-ын гишүүн Б.Баярсайхан: Төсвийн байнгын хорооны санал дүгнэлтэд иргэдийг орлоготой болгож, цар тахлын үед ААН-үүдийг дэмжихийн тулд соёлын төв, музейн барилгуудын санхүүжилтийг түр хугацаанд зогсоох гэсэн ийм санал орж ирсэн байна.

Би үүнийг асар их эсэргүүцэж байна. Соёл, түүх, өв уламжлал  ёс заншил гэдэг бол тухайн улс орны тусгаар тогтнол, дархлаа нь байдаг.

Монголчууд бид ардчилал, зах зээлийн нийгэмд шилжсэнээс хойших 30 жилд гаргасан хамгийн том алдаа бол соёлын салбарыг шоовдорлож, энэ салбарт байсан бүтээн байгуулалтуудыг устгасан явдал.

Бид Хүүхэд залуучуудын театртай байсан. Энэ өнөөдөр банк болсон. Ард кино театрын барилга худалдааны мухлаг болсон. Цирк байхгүй болсон. Өнөөдөр Монгол Улс шиг тайзан дээр манежгүй циркээ тоглож байгаа ийм улс орон байхгүй.

Ю.Цэдэнбал гуайн үеэс хойш 50-60 жилийн дараа соёлын салбарт хөрөнгө оруулалт тавигдаад, энэ салбарыг өөд нь татъя гэтэл улстөржүүлэх асуудал гаргаж ирж байгаад би харамсаж байна.

Өөрсдөө соёлын салбараа орхисон хэр нь өнөөгийн залуусыг Монгол хүн байсангүй, гадны соёлд нэвтэрч байна гэж шүүмжилж байна. Уран бүтээлчдийн урлагт хайртай зүрх сэтгэл дээр л Монголын соёлын салбар явж байгаа шүү. Цар тахлын хүнд цаг үе ирснийг ойлгож байна. Гэхдээ ээж, аав, эмээ, өвөө нар маань дайны хүнд цаг үед бүхнийг фронтод зориулж явж байх үедээ Монгол Улсын Их сургуулийг байгуулсан. 1924 онд Монгол Улс Үндэсний музейгээ байгуулж байсан.

УИХ-ын гишүүд нь соёлын салбарын ад үзээд суувал ард иргэдээ яаж соён гэгээрүүлэх вэ. Музейн барилгыг яагаад ингэж үл тоож ярьж байгаа юм бэ. Хээр хэвтэж байгаа хиргисүүр хүртэл бидний түүхийг ярьж байдаг юм шүү. Тийм учраас улстөржилт гэдэг зүйлээ соёлын салбар, спортын салбараас хол байлгаач. Харин үүнийхээ оронд дэмжээч ээ, 2021 оны төсөвт суугдсан энэ жаахан мөнгийг битгий хөндөөч гэж хүсэж байна.