УИХ-ын нэгдсэн хуралдаанаар Банкны тухай хуульд өөрчлөлт оруулах хуулийн төслийг хэлэлцлээ. Энэ үеэр УИХ-ын гишүүн Л.Энх-Амгалан "Монгол Улсад цаашдаа банкны ямар тогтолцоо байх вэ гэдгээ тодорхой болгохгүй бол банк нь жинхэнэ банк шиг, банкны эзэд нь банкны эзэд шиг байхгүй бол банкны эзэд бусдын бизнес рүү хүч түрж ордог, булаадаг, өөр салбарт орж бусадтайгаа өрсөлддөг ийм байж болохгүй. 

Өнөөдөр Дагдангийн эхнэрийн таргалсан Дулмаагийн турсан хоёр яг тэнцэнэ гэдэг шиг Банкны эздийн таргалсан иргэдийн турсан хоёр яг тэнцэнэ. Үндсэндээ чөтгөрийн тойрог гэдэг шиг зээлийн хүү, мөнгө хүүлэлтийн дунд иргэд амьдарч байна.

Харамсалтай нь УИХ, Засгийн газраас авч хэрэгжүүлсэн арга хэмжээнүүд иргэдийн амьдралд мэдрэгдсэн үү гэвэл мэдрэгдэж чадаагүй. Иргэдэд зээлийн хэрэгцээ маш их байдаг ч барьцааны асуудал үүсдэг. Үл хөдлөх хөрөнгийг нь маш бага үнэлдэг.

Тиймээс Зээлийн батлан даалтын санг жинхэнэ утгаар нь амь оруулах ёстой. Үндсэндээ өнгөрсөн хугацаанд Төрийн банк болон арилжааны банкууд Зээлийн батлан даалтын сангийн баталгааг ерөөсөө баталгаа гэж үзээгүй шүү" гэлээ.