УИХ-ын гишүүн Л.Энх-Амгалан: З.Мэндсайхан сайд аа, бидний өнөөдрийн баталж байгаа хуулийн гол үр дүн ард түмэнд л хүрэх ёстой. Ард түмний гар дээр энэ гурил, цагаан будаа, ургамлын тос чинь яг ямар үнээр хүрэх вэ гэдэг л чухал байхгүй юу.

Бид Улсын төсвийн орлогоос 39 тэрбумын орлого хасаад энэ компанитай нөхдүүдэд хөнгөлөлт өгч байна. Сая би танаас асуухад 40, 50 компани энэ хөнгөлөлтөд хамрагдах болов уу гэсэн тооцоо хэлж байх шиг байна.

Бидэнд нэг гашуун туршлага бий. Энэ хөнгөлөлтөөр нийтдээ 16.5 хувийн хөнгөлөлт өгч байна. Тэгэхээр одоогийн зарж байгаа үнээс хамгийн багадаа 16 хувиар бага үнээр бараа бүтээгдэхүүнүүд иргэдийн гар дээр очих ёстой.

Гэтэл энэ компаниуд хөнгөлүүлж авчхаад үнээ буулгадаггүй байхгүй юу. Бензин, шатахууныг мэдэж байгаа биз дээ. Дэлхийн зах зээл дээр үнэ нь буучхаад байхад Монголын зах зээл дээр үнэ нь бууруулдаггүй шдээ. Яг түүнтэй адил энэ нөхдүүдэд татварын хөнгөлөлт өгч байгаа бол та наад яаман дээрээ дуудаж авч ирээд ам өчгийг нь ав. Тэгэхгүй бол татварын хөнгөлөлт авчхаад үнээ хөнгөлдөггүй ийм нөхдүүд зөндөө байж байгаа. Гар бариад бугуй барьдаг.

Банкны зээлтэй холбоотой хөнгөлөлтүүдээ хар л даа. Бид нар өчнөөн тогтоол баталж өгөөд, өчнөөн чиглэл өгөөд байдаг. Гэтэл өнөөдөр 12 банк 12 янзын нөхцөл ярьж байна.

Тэрэнтэй адил та наад хөнгөлөлт авах гэж байгаа 40, 50 компанийн нөхдүүдээ дуудаж тодорхой хэлцэл хий. Тэгж байж энэ хөнгөлөлтөд нь хамруулахгүй бол наад нөхдүүд чинь үнээ бууруулахгүй шүү. Тэгээд энэ хөнгөлөлтүүд чинь наад нөхдүүдийн чинь карманд л орно гэсэн үг.