“Эрдэнэт үйлдвэр” ТӨҮГ 47,360 евро буюу өнөөдрийн Хаан банкны нэрлэсэн ханшаар 160 сая 194 мянга 252 төгрөг 80 мөнгөөр Италийн алдарт “MINOTTI LUIGI & BENIGNO” брэндийн алтан ширээ, тумбочка худалдаж авсан асуудлыг "Шилэн" Цогоо өнөөдөр олон нийтэд ил болгожээ.

“Эрдэнэт үйлдвэр” ТӨҮГ дээрх ширээ, тумбочкуудыг 2019 оны 11 дүгээр сард худалдан авсан ч уг худалдан авалтын мэдээллээ шилэн дансны мэдээлэл дээрээ байршуулаагүй нь сонирхол татаж байна. 

Иргэн "Шилэн" Цогоогийн тухайд Эрдэнэт үйлдвэр ТӨҮГ-ын нийт худалдан авалтын 30 хувьд шилэн дансаар дамжуулан хяналт тавьж, олон нийтэд мэдээлэл хүргэдэг байсан бол одооноос эхлэн тус үйлдвэрийн гадаад валютын худалдан авалтад ийнхүү хяналт тавьж, холбогдох баримтуудыг олон нийтэд ил болгож эхэлсэн бололтой.

Нөгөөтээгүүр Эрдэнэт үйлдвэрийн удирдлагууд доллар, еврогоор хийсэн гүйлгээнүүдээ шилэн данс дээр огт бичилт хийдэггүй болохыг Шилэн Цогоогийн дэлгэсэн энэхүү баримтууд харуулж байна. 

Хамгийн сонирхолтой нь Эрдэнэт үйлдвэр ТӨҮГ-ын удирдлагуудын өнгөрсөн онд худалдаж авсан Итали брэндийн 1 ширхэг алтан ширээ (цайны ширээ)  2 ширхэг тумбочко Эрдэнэт үйлдвэр ТӨҮГ-ын Ерөнхий захирлын Санхүү, эдийн засаг хариуцсан орлогч Доржсүрэнгийн Үүрийнтуяагийн албан өрөөнд байдаг гэсэн мэдээлэл байна.

Эрдэнэт үйлдвэр 160 сая төгрөгөөр алтан ширээ худалдаж авахын оронд хэдэн уурхайчныг орох орон, унах унаатай болгож болох байсан бэ?

Хэрвээ Х.Бадамсүрэн, Д.Үүрийнтуяа тэргүүтэй Эрдэнэт үйлдвэрийн удирдлагууд уурхайчдаа боддог, тэдний амьдрал ахуйд санаа тавьдаг байсан бол 160 сая төгрөгөөр 1 ширхэг алтан ширээ, 2 ширхэг тумбочко худалдаж авахын оронд 10 ажилтандаа (1 приус 30 маркийн авто машин - 16.0 сая ₮) 10 ширхэг приус авто машин аль эсвэл 16 ширхэг Канад модон байшин худалдан авч (1 канад модон байшин 10.0 сая ₮) 16 уурхайчнаа орох орон, уна унаатай болгох байж. Гэтэл тэд тэгсэнгүй. Цай, кофе уух зориулалттай алтан ширээ худалдан авч тансаглахыг илүүд үзсэн байна.

ЭХ СУРВАЛЖ: NEWSTV.MN