Асашёрюү Д.Дагвадорж 2007 онд Монголын үндэсний циркийг “Аса Константинг” ХХК-аараа дамжуулан менежментийн хувьчлал нэрээр хувьчлан авч байв. Тухайн үед тэрээр Монголын циркийг дэлхийн төвшинд гаргаж, байгаа байшинг нь арчилж тордоно гэх мэтээр аль сайхан амлалтыг өгч байлаа. Гэвч үүнээс хойш юу болсныг Монголчууд сайн мэдэж байгаа. Хамгийн харамсалтай нь Д.Дагвадорж тэргүүтнүүд үндэсний циркийг хувьчилж авснаас хойш 80 жилийн түүхтэй Монголын циркийн урлаг гудамжинд гарсан.

Тэр бүү хэл хувьчлалаас өмнө 44 байсан циркийн амьтад хувьчлалын дараа ор сураггүй алга болцгоожээ. Циркийн амьтад алга болсон шалтгааныг Д.Дагвадорж “Орос, Монголоос өөр амьтан тамладаг газар байхгүй. Тэр амьтад чинь хөгширч, элэгдээд үхдэг юм байгаа биз дээ” хэмээн тайлбарлаж байв.

Д.Дагвадорж үндэсний циркийг хувьчилж авснаас хойш циркийн барилга тэр аяараа шахуу түрээсийн байр болж хувирсан нь бас л худлаа биш. Цирк Д.Дагвадоржийн гараар орсон тэр үеэс эхлэн  асар богино хугацаанд машин угаалгын газар, банк, компьютер тоглоомын газар, баар ресторан, худалдаа үйлчилгээний газар болж хувирсан байдаг.

Бүр энэ байдлаас болж ШӨХТГ-ын дарга асан О.Магнай 2014 онд циркийн хэвийн үйл ажиллагааг сэргээхийг Д.Дагвадоржоос шаардаж төрд буцаан авах тухай асуудлыг хөндөж байлаа. Гэтэл Д.Дагвадорж чаддаг юм бол буцааж аваарай гэж тавлаж байв.

Тэгтэл өдгөө Д.Дагвадорж тэргүүтнүүдийн шунал Монголын циркийг гудамжинд хөөж гаргаад зогсохгүй байгаа ганц байшинг нь дотроос нь нураахад хүргэжээ.

Уг нь шинээр байгуулагдсан Соёлын яам Монголдоо цор ганц байгаа үндэсний циркийн барилгыг төрд буцааж авах тухай асуудлыг хөндөж эхэлж байв. Гэтэл төр булаагаад авах бий гэсэн шиг дотроос нь нураагаад нэг л шөнө үнсэн товорго болгохоор зэхэж байгаа нь харамсалтай.

Энэ бүхнээс харахад Аса аваргад анхнаасаа Монголын циркийн урлаг, үүх түүх шингэсэн өвөрмөгц шийдэлтэй барилга байгууламж нь биш хотын А зэрэглэлийн бүсэд байрладаг 35666м2 эзэмшил газар нь л юу юунаас илүү хэрэгтэй байсан юм болов уу даа.

ЭХ СУРВАЛЖ: NEWSTV.MN