Сү.Батболд гэдэг хүнийг муулах, харлуулах нь Монголд сонгууль дөхсөнийг илтгэдэг болоод лавтай УИХ-ын хоёр мөчлөг өнгөрчээ. Энэ удаад ч жамаараа болов. Муу л бол хойд талын хар овоохой гэгчээр, Хаврын чуулган эхлэхтэй зэрэгцээд Чон Чү Ён гэх солонгос бизнесмений оффшор компанийн дансанд Малайзын тэтгэврийн сангаас мөнгө орсныг Сү.Батболд хүүхдүүдтэйгээ нийлээд авчихсан мэт гүтгэлэг хаа байсан Малайзын сонин хэвлэлд бичигдэж, тэр даруйдаа Монголд сэвэгдсэн нь лав санамсаргүй тохиолдол биш.

Уг нь, Сү.Батболд гишүүнийг Чон Чү Ён гэгч тэр солонгос бизнесментэй холбоотой гэсэн гүтгэлэг аль гурван жилийн өмнө гарч, Нью Йоркийн шүүх дээр шалгагдаад ямар ч холбоогүй гэдэг үнэн мөн нь тогтоогдчихсон юм. Гишүүн ч өөрөө тухайн үед нь тайлбар өгч, ямар ч холбоогүй болох нь Шүүх дээр нотлогдсон гэж мэдэгдэл хийгээд энэ асуудалд цэг тавьсан байдаг.

Нью Йоркийн шүүх бол эрх баригч нам нь улс төрийн өрсөлдөгчөө дарж авахын тулд хийж байсан ажлуудыг нь өөнтөглөж, шинэ, шинэ хэргүүд гаргаж ирдэг Малайзын шүүх биш. Дэлхийд нэр хүндтэй, гаргасан шийдвэрүүд нь олон улсад жишиг болж үлддэг хамгийн голч шударга шүүх гэдгийг хэн хүнгүй мэднэ.

Энэ шүүх дээр нотлогдсон шийдвэр илүү юу, улс төрийн бохир тэмцэл өрнүүлж буй, хуулийнхан нь хүртэл хутгалдаад орчихсон Малайзын шүүх дээр яригдсан асуудал чухал уу.

Цаг хугацаа талаас нь харсан ч Малайзын шүүх дээр яригдсан, Чон Чү Ён гэгчийн компани руу шилжүүлсэн 15 сая ам.долларын гүйлгээ 2010 оных, Сү.Батболд Чон Чү Ён хоёр ямар ч хамаагүй гэдгийг тогтоосон Нью Йоркийн шүүхийн шийдвэр 2021 оных. Хэвлэлүүд ийм тов тодорхой баримтыг үл хэрэгсэн, Монголд татаж авчирч байгаа нь, Сү.Батболдоос буруутгах байтугай шүүмжлэх ч шалтаг олоогүйг нь илтгэнэ. 

Номхон тэмээг ноолоход амар гэгчээр яасан ч их гүтгэдэг юм бэ, цаадах нь ч яасан их тэвчээртэй юм бэ. Гүтгэсэн хүн бүхэнтэй заргалдаж, хууль шүүхэд барьж өгөөд явж байсан бол өнөөдөр Монголд сэтгүүлч үлдэх үү, үгүй юу л болох байсан байх. Гэтэл Сү өөр, юм болгонд үсчээд, өрвөлзөөд байдаггүй. Магадгүй энэ нь буруу юм хийгээгүй хүний зан байх л даа. Ер нь ажил хийдэг, зөв явж байгаа нэгнээ харлуулж байж оноо авна гэдэг одоо ганцхан Монголын улс төрд байгаа, цаашид огт байж болохгүй буруу жишиг юм даа.

Д.Түвшин