МАН-ын дарга, Ерөнхий сайд У.Хүрэлсүх 2021 оны Монгол Улсын Ерөнхийлөгчийн сонгуульд нэр дэвшин өрсөлдөх нь нэгэнт тодорхой болсон гэнэ. Учир нь УИХ-ын сонгуульд өөрийнхөө нэр нүүрээр 62 суудал авч ирсэн, ард иргэдийн дунд Х.Баттулгаас ч илүү нэр хүндтэй байгаа тул энэ нь бүрэн боломжтой зүйл хэмээн ойрын хүмүүс нь түүнд зөвлөжээ. Ингээд дараагийн нүүдлээ ч бас давхар тооцоолоод амжсан байгаа юм. Энэ нь У.Хүрэлсүх Ерөнхийлөгчөөр сонгогдвол намын дарга, Ерөнхий сайдын суудлаа Г.Занданшатарт өвлүүлнэ гэх тохиролцоо.
Энэ тухайгаа тэд ЗГХЭГ-ын дарга Л.Оюун-Эрдэнэд хараахан хэлээгүй байсан бөгөөд У.Хүрэлсүх, Г.Занданшатар нарын нууц тохироог олж мэдсэн Л.Оюун-Эрдэнэ боож үхэх шахсан гэнэ. Учир нь У.Хүрэлсүх Ерөнхийлөгч болчихвол Л.Оюун-Эрдэнэ өөрийгөө дараагийн Ерөнхий сайд болно гэдэгт бат итгэлтэй явжээ.
Нэгэнт асуудал ингэж шийдэгдэж, өөрөөс нь гадуур хуйвалдаан өрнөсөн тул Л.Оюун-Эрдэнэ өөрийгөө тагнаж чагнасан хэмээн үзэж УИХ-ын Тусгай хяналтын дэд хороонд гомдол гарган У.Хүрэлсүх, Г.Занданшатар нартай нэгийгээ үзэхээр шийдээд байсан гэх. Гэтэл эл асуудал тоглоом биш болж хувираад ЗГХЭГ-ын дарга Л.Оюун-Эрдэнийг Г.Занданшатарын даалгавараар Тагнуулын байгууллагын удирдлагууд тагнасан байж болзошгүй нөхцөл байдал тогтоогдсон гэх мэдээлэл байна. Хэрвээ тийм зүйл болсон байх аваас, энэ нь тэгээд нийтэд ил болоод задарчихвал Л.Оюун-Эрдэнэ Г.Занданшатар нарын хооронд улстөрийн эвлэршгүй өс үүснэ.
Тиймээс У.Хүрэлсүх Л.Оюун-Эрдэнийг тайвшруулж Ерөнхий сайд болгоно хэмээн амлалт өгөөд, энэ тухай хардалт сэрдэлтийг зогсоохын тулд УИХ-ын гишүүн дээр “дур мэдэн” гүйцэтгэх ажиллагаа явуулсан ТЕГ-ын дарга Д.Гэрэлээр туг тахисан болоод өнгөрчээ.
ТЕГ-ын дарга Д.Гэрэлийн тухайд Г.Занданшатарын үгээр хөдөлдөг нэгэн гэх мэдээлэл бий. Ямартай л Г.Занданшатар Тагнуулын даргатай нууц уулзалт зохион байгуулж, үүрэг чиглэл өгчээ гэх мэдээлэл цацагдаж байх вэ. Г.Занданшатар У.Хүрэлсүхтэй ойлголцдог тулдаа л өнөөг хүртэл Д.Гэрэл гэх тэтгэврийн хөгшнийг цээжээрээ хамгаалан суудалд нь авч үлдсээр ирсэн ч энэ удаад яаж чадаагүй бололтой.
Хэрвээ Ерөнхийлөгч болж чадахгүй бол У.Хүрэлсүхийг М.Энхболдынх шиг хувь тавилан хүлээж байгааг тэр сайн мэдэрч байгаа. Тэр цагт Л.Оюун-Эрдэнэ юу ч хийхийг хэн ч таашгүй. Г.Занданшатар ч зангаа хувиргаж болзошгүй. Тиймээс У.Хүрэлсүх Л.Оюун-Эрдэнийг гомдоохыг одоохондоо хүсэхгүй байгаа бололтой.
ЭХ СУРВАЛЖ: NEWSTV.MN
Сэтгэгдэл (20)