Монгол Улсын Шадар сайд, УОК-ын дарга С.Амарсайханы эхнэр Ч.Ичинхорлоо ХӨСҮТ-ийн "Улаан бүс" рүү сахиураар нэвтэрсэн ч маргааш нь "Орчин нь таалагдахгүй байна" гэдэг шалтгаанаар гэртээ гарсан болох нь батлагдсан. Харин иргэд олон нийтийн зүгээс уг асуудалд дургүйцлээ илэрхийлж, Гамшгаас хамгаалах тухай хуулийг гэр бүлээрээ зөрчсөн С.Амарсайхан ёс зүйн хариуцлага хүлээж Шадар сайдын суудлаасаа сайн дураараа огцрох ёстой гэсэн шаардлагыг тавьж байгаа юм.
Тэгвэл өнөөдөр Шадар сайд С.Амарсайхан уг асуудлаар байр сууриа илэрхийлж ямар ч хууль зөрчөөгүй гэдгээ хэлж, цар тахлаар бизнес хийж байгаа бүлэг этгээдүүд өөрийг нь зайлуулахаар санаархаж байна хэмээн мэдэгдлээ.
Тэрбээр энэ талаар, “Би өөрийгөө цар тахалтай тэмцэж байгаа гэж бодож байна. Гэтэл зарим нэг нь надтай тэмцээд байх шиг байна. Би Монгол Улсын Шадар сайдын хувьд хариуцлагатай хэлэхэд би болон манай гэр бүлийн хүн хууль дүрэм зөрчөөгүй, давуу эрх эдлээгүй. Харин ч иргэддээ дутуу эрх эдлүүлэхгүй байх тал дээр шаардлага тавьж ажиллаж байгаа.Шадар сайдын ажил бол зөвхөн короновирустай тэмцэх ажил биш, эрхлэх асуудлын хүрээнд олон салбар байдаг. Засгийн газар хоорондын комисс, гадаад дотооод харилцаа гээд өчнөөн олон ажил байдаг учраас хэрэг зарга хийсэн бүхний араас яваад байх боломжгүй, тайлбар өгөөд явах цаг зав үнэндээ алга байна.
Харин би хариуцлага тооцох тал дээр үзэл бодол, үнэт зүйлтэйгээ зууралдана. Улсыг төртэй нь, улстөрчидтэй нь худалдаад авчихдаг банк санхүү бизнесийн бүлэглэл, цар тахлаар бизнес хийдэг хэсэг бүлэг этгээдүүд, цар тахлын цаана тусгаарлах байраар бизнес хийдэг нөхдүүд гээд салбар, салбарт бугшсан нөхдүүд намайг зайлуулахын тулд зохион байгуулалттай ажиллаж байгаа. Бусад иргэдийн адил би албан тушаалтан мөн ч бай, биш ч байлаа манай гэр бүл адилхан эрхээ эдлээд л явж байгаа. Хууль зөрчөөгүй. Гэвч зохион байгуулалттай дүрэм журам зөрчсөн болгож байгаа. Сүүлдээ компьютерын хард диск хулгайлсан болгож байгаа, нэгдүгээр эмнэлэгт шинжилгээ өгөөгүй эхнэрийг маань өгсөн болгож зориуд систем дээр шивж оруулж байгаа гэх мэтийн нарийн зурсан. Төрийг худалдаад авчихсан төрөөр бизнес хийдэг нөхдүүд эрчимтэй ажиллаж байгаа. Түүнээс би няцаж, ухрахгүй, хэлэх зүйлээ хэлнэ, тавьдаг шаардлагаа тавина, хийдэг ажлаа хийнэ. Өвчтэй, зовлонтой ахмадуудынхаа санааг зовоогоод яах вэ гээд чимээгүй, хүлээцтэй хандаад явахаар номхон морийг ноолоход амар гэдэг шиг зөөлчлөх гээд өөрсдийн хууль бус үйлдлийг дарж нуухын тулд С.Амарсайханыг харлуулж байна” гэжээ.
Сэтгэгдэл (101)