Монгол Улсын Хөдөлмөрийн баатар, олимпын аварга Н.Түвшинбаяр өнгөрсөн амралтын өдөр Монгол Улсын начин Э.Энхбатыг зодож, эрүүл мэндэд нь хохирол учруулсан харамсалтай хэрэг гарсан. Тус хэргийг Хан-Уул дүүргийн Цагдаагийн I хэлтэст шалгаж байгаа бөгөөд хэрэгтэн Н.Түвшинбаярыг ШШГЕГ-ын харьяа Цагдан хорих 461 дүгээр ангид өнгөрсөн шөнө саатуулсан байна.
Тэгвэл өнөөдөр ЦЕГ-ын Хэвлэл мэдээллийн төвийн дарга, хурандаа Б.Баатархүү дээрх хэргийн талаар хэвлэлд мэдээлэл өглөө. Тэрбээр "Дөрөвдүгээр сарын 2-ны өдрийн 21:29 цагт Хан-Уул дүүргийн нэгдүгээр хорооны нутаг дэвсгэрт байрлах "Залуу монгол" корпорацын байранд хүмүүс зодолдоод байна гэх дуудлага цагдаагийн байгууллагад ирсэн. Дуудлагын дагуу тус дүүргийн цагдаагийн газрын нэгдүгээр хэлтсийн алба хаагчид хэргийн газар очиж ажилласан.
Хохирогч Э.Энхбат ГССҮТ-ийн Эрчимт эмчилгээний тасагт хэвтэн эмчлүүлж байгаа. Уг хэрэгт холбогдуулан сэжигтэн Н.Түвшинбаяраас өмгөөлөгчийг байлцуулан мэдүүлэг авсан. Тэрбээр биеийн байдлын улмаас эмчлүүлэх хүсэлт гаргасан. Тухайн хүсэлтийг хангаж өгсөн. Гэхдээ энэ хэрэгтэй холбогдуулан Н.Түвшинбаярыг хойшлуулахгүйгээр өнгөрсөн шөнө баривчлан, хорих 461 дүгээр ангид хүргэсэн. Цагдаагийн байгууллагаас Эрүүгийн хуулийн 11.1 гэдэг зүйлээр эрүүгийн хэрэг үүсгэж, яллагдагчаар татах саналаа прокурорт хүргүүлсэн. Түүнийг үргэлжлүүлэн 30 хоног цагдан хорих эсэхийг Хан-Уул дүүргийн Эрүүгийн хэргийн анхан шатны шүүх шийднэ" хэмээн мэдээлэв.
Эрүүгийн хуулийн 11.1-т зааснаар Н.Түвшинбаяр гэм буруутай нь тогтоогдох аваас 40 сая төгрөгөөр торгуулах эсвэл 2-8 жилийн хорих ял сонсох юм.
Сэтгэгдэл (16)