АН-ын дарга асан С.Эрдэнэ өмгөөлөгч Г.Батбаярын хамт өнөөдөр /2021.03.25/ нэгэн ноцтой мэдэгдэл хийж Ерөнхийлөгч Х.Баттулга хууль шүүхийн байгууллагын тусламжтайгаар бусдыг хилс хэрэгт тохож, ялладаг болохыг баталлаа.
Тэрбээр энэ үеэр “Ерөнхийлөгч Х.Баттулга З.Энхболдоор дамжуулан АН-ыг авах санаархлаа хэрэгжүүлсэн. Ингэхдээ надад болон миний охин Э.Содгэрэлд холбогдуулан шалгаж байсан хоёр хавтаст хэргийг хэрэгсэхгүй болгох, оронд нь АН-ын даргын суудлаа хэл амгүй өгөх санал тавьсан.
Улмаар гуравдугаар сарын нэгний оройны 19 цаг 30 минутын орчимд Ерөнхийлөгч Х.Баттулгын шадар туслах Түвшинжаргал гэдэг бүсгүй над руу утасдаж “С.Эрдэнэ даргаа танд бичиг өгөх гэсэн юм аа” гээд ярьсан.
Уг бичгийг задлаад үзэхэд Нийслэлийн прокурор Ц.Насанбатын гарын үсэгтэй надад үүсгэсэн эрүүгийн хоёр хэргийг хэрэгсэхгүй болгосон тогтоолыг надад ирүүлсэн байсан. Яахаараа Нийслэлийн прокурорын тогтоолыг МУ-ын Ерөнхийлөгчийн шадар туслах надад өгдөг юм бэ. Түүгээрээ надад юу ойлгуулах гээд байгаа юм. Хэргийг чинь хэрэгсэхгүй болголоо шүү, одоо чи аятайхан байгаарай гэж надад ойлгуулах гээд байгаа юм уу?
Мөн З.Энхболд надад дараалан намайг Ерөнхийлөгчтэй очиж уулз гэж шахсан. Миний зүгээс З.Энхболдод ганцхан зүйл хэлсэн. Тэр нь “Би Ардчилсан нам, ардчиллын хувь заяагаар ямар нэгэн хэрэг наймаалцдаг хүн биш ээ. Та нар энэ зохиомолоор хүн гүтгэдэг ажлаа боль” гэдгийг З.Энхболдод хатуу хэлсэн. Хоёр зуун мянган гишүүнтэй АН өнөөдөр Зандаахүүгийн Энхболд гэдэг төрийн хутгуураар дутахгүй. Яаж төр хутгадгийг нь би мэднэ.
Товчхондоо бол өнөөдөр хэн нэгэн эрх мэдэлтний дохио зангаагаар Монголын хуулийн байгууллага ажиллаж байгаагийн тод жишээ нь ердөө л энэ. Би энэ нөхдүүдээс айхгүй. Энэ завхралыг бий болгож байгаа хүн бол Ерөнхийлөгч Халтмаагийн Баттулга гэдгийг хариуцлагатайгаар хэлмээр байна” гэлээ.
Сэтгэгдэл (49)